"احمد شهيد" ين راپوروندا نده ن تورک - قيزيلباش لارين 

سورونلارينا يئر وئريلمه ميش دير؟

يازان:  گونئي آزربـايجان و ايران توركلري قيزيلباش اوجاغي 

(AQO)

  گئچدييميز گونلرده آيلاردير ماراقلانديغيميز، بيرلشميش ميلت لر تشکيلاتي نين (BMT) اؤزه ل راپورجوسو، احمد شهيد ين، "ايران اينسان حاقلاري" دورومو ايله ايلگيلي وئرديگي ايلک ديرلنديرمه راپورو، بير چوخ خبر قايناقلاريندا يايينلادي. راپور، آشاغي دا کي آلتي بؤلومدن تشكيل تاپميشدير. هر بؤلومده احمد شهيد (مالديو اؤلكه سينين اؤنجه کي ديش ايشلر باخاني) "ايران اينسان حاقلاري" ايله ايلگيلي اؤز دوشونجه و گؤروشلريني نوت لار حالينده وئرميشدير:

• ايران رژيمي نين سيويل و مدني توپلوم آکتيوسيت لري ايله داورانيش بيچيمي (سياسي آکتيويستلر، قازئته چي لر، اؤيرنجي آکتيويست لر، صنعتچي لر، وكيل لر و چئوره آکتيويست لري  ايله ايلگيلي قونولاري اله آلميش دير)،  
• توپلوم اؤزگورلويو،  
• قادين حاقلاري،  
• ائتنيک و ديني آزينليق لار،   
• اعدام جزالاري،
•  يورد ديشي اورگان لارلا باغلانتي لي محبوسلار.

  گؤردويونوز كيمي احمد شهيد بو راپوردا، ائتنيک و دينسل آزينليق لار قونولاريندان  علاوه اورمو گؤلونون قورونماسي ايله ايلگيلي آپاريلان اعتيراض لاردا ان آزيندان 60 نفرين توتوقلانماسيندان و... آچيقلامالار ائله ميش دير كي بوردان احمد شهيده اؤز تشكرلريمي بيلديرمك ايسته ييريم.

  راپوردا اؤزه لليکله بهايي ليک و بهايي لر آزينليغي ايله ايلگيلي دئتاي لي بيلگي لر وئريلميش دير. آيريجا دين لريني دئييشيب، حيرستيان اولانلارين سورونلاريندان، نعمت اللهي درويشلرين توتوقانيب زندانا آتيلمالاريندان و سني آزينليق لارين سورونلاريندان اؤرنکلر وئريلميش دير. بو راپوردا رژيمه قارشي شيعي ملالاردان دا بحث ائديلميش دير کي بو گؤروشلرين هاميسي چوخ يئرينده و تاسفلر اولسون كي ايران ايسلام جمهوريتينده سيخ - سيخ گورونن حاديثه لر و خبرلردير. آنجاق بو آزينليق لار و ظولمه معروض قالان لار ايچينده ندن سه تورک – قيزيلباش لاردان بحث ائديلمه ميش دير؟!   

  ايران دا تورك –قيزيلباشلار گرچك دن بو قدر سورونسوز بير آزينليق مي ديرلار؟ البته  کي دئييل! يا وار اولان سورونلار احمد شهيده دئييلمه ميش دير و يا  تورك–قيزيلباشلارين  خوش گؤرولويونده ن اولسا گره ک، آدي ذکر ائديلمه بئله گرک حيس اولونماميش دير.

  ايران وطنداشليغينا عاييد اولان هر توپلولوغون اؤز ياپي سيندان قايناقلانان اؤزه ل و گئنل سورونلاري واردير. بو مقاله ده گئنل اولاراق تورک – قيزيلباش لار ين سورونلاريندان اؤزه لليکله سوسيال ياپي دا وطنداش ليق سورونلاري ايله ايلگيلي دوشونجه لر پايلاشيلاجاقدير.

  بوگون ايران داکي ديني آزينليق لارين نفوس سايي لاري ايله ايلگيلي کسين رقم لر آچيقلانماميش دير. حاکيم رژيم، فاشيست پهلوي رژيمي نين آيريمجيليق سياست لري نين دوام جي سي كيمي، اويقولانان تک ديللي، تک دين لي، تك ايرکلي، تک ايده لوژي لي و تک مذهب لي هوموژن بير ميلت ياراتما تلاشي ايچينده دير. آماج توپلومدا وار اولان فرق ليليق لاري اورتادان قالديرماق و هر تورلو ديني، ائتنيک، کولتورل و مذهب  فرق ليليغي باسديرماق و اؤته کي لشديرمک دير. رژيم، فارسچي و شيعه چي محورلي پوليتايکالاريندان دولايي هيچ بير رسمي قايناقلاريندا، وطنداشليق قاورامي آلتيندا ياشاماقدا اولان تورک، بلوچ، عرب كيمي ائتنيک آزينليق و چوخونلوق لارين نفوس سايي لاري قونوسوندا تام رقم لر ورمه مک ده دير. بوتون آمارلاردا، ملي كارت لاردا و شناسنامه لرده ائتنيک و دينسل بيلگي لر ايله ايلگلي بيلگي وئريلمه مه کده دير. هوموژن بير ميلت ياراتما پروژه سي آدينا هر کسي شيعه و فارس کيم لييي مجموعه سينده گيزله تمه يه چاليشيلاراق اؤرت - باس ائتمه يه اوغراشماقداديرلار. ساده جه حيرستيان، يهودي و زرتشتي آزينليق لار ايران ياسالارينا گؤره اؤنملي آزينليق لار ساييلماقدادير و اؤزلرينه مخصوص اوخوللاري، ديني کيتابلاري و  مجليس ده تمثيل جي لري واردير. بو آزينليق لار بؤيله تمل حقلره صاحيب اولدوقلاري حالده، ايران تورکلري اؤز آنا ديللرينده يازيب اوخوماقدان بئله يوخسولدورلار. نفوس آچيسيندان چوغونلوغا صاحيب اولان بو اينسانلار دموکراتيک يوللاردان و ائورنسل اينسان حاقلاري چرچيوسينده اؤز دوغال حاقلاري ايچين مجاديله وئرمک ده و باشدا BMT اينسان حاقلاري کميسيونلاري اولماق اوزره، توم اينسان حاقلاريني ساوونان اؤرگود و اورقانلاريندان اؤز مجاديله لري ايچين گرک لي دستک وئرمه لريني طلب ائتمک ده ديرلر.[1]

  اصلينده تورک – قيزيلباش توپلولوقلاري چوخونلوقلا، پهلوي دؤنه مين يئتميش لي[2] ايللرينه قدر سياسال و سوسيو-اكونوميک نده ن لرله قاپالي و  قيرسال آلاندا  ياشاملاريني  سوردورمک ده يدي لر. آنجاق  کند لردن شهرلره كؤچ ائده ن تورک – قيزيلباش، اؤزلليکله ايسلام دئوريم يندن سونرا تورک – قيزيلباش ليق سيمگه سي اولان بوغلار و ديني فرق ليقلاردان دولايي و آيريجا ياشاديقلاري اكونوميک، کولتورل و سوسيال شوک لار نده ني ايله تقيه[3] جاناوارينا سيغينماق زوروندا قالديلار. هم دولت ين يالنيش پوليتيکالاري و هم بو بوشلوقلاردان جسارت له نن جاهيل لر طرفيندن آشاغيلانان گئنل ليک له گنج تورک – قيزيلباشلار وارليقلاريني دئييشيک شکيل لرده تظاهر ائتديرمه يه چاليشديلار. چئشيدلي افترالارا معروض قالان تورک – قيزيلباش لار، اونيورسيته و دولت ايشلري كيمي ايمکانلاردان محروم قالديلار. البته کي بو محروميت، هم اكونوميک هم سياسال ايتگي لريني برابرينده گئتيرير. تورک – قيزيلباش لار سون يوز ايلده آزينليق لار ايچينده اؤنملي بير نفوس اورانينا صاحيب اولمالارينا قارشين قرار آليجي مکانيزمالاردا يئر آلا بيلمه ديلر. بو مارژيناليته اؤزلليكله سون يوز ايلده اؤزونو آرتيق راق گؤسترمکده دير. سون يوز ايلده تورک – قيزيلباش لار شبهه ايله باخيلدي و شيعه لييين بير آبارتيلي فورماسي ويا آبارتيلميش مئتودو اولاراق گؤستريلمه يه و اينانديريلمايا چاليشيلدي.   

  تورک – قيزيلباش لارين اينانجينا گؤره توم اينسانلار حرّ، حيثييت و حق لر آچيسيندان ائشيد دوغارلار. آغيل و ويجدانا صاحيب ديرلر و بير بيرينه قارشي قارداشليق دوشونجه سي ايله حرکت ائتمه لي ديرلر. Jack DANNEY[4] بو قونودا دئميش کي:  " تئوريده و اويقولامادا ائورنسل اينسان حاقلاري، حايات ايچين دئييل، ساده جه اونورلو بير حايات ايچيندير." ايران ايسلام جمهوريتي نين آنا ياساسينا گؤره، هر کس قانون قارشيسيندا ائشيددير! (ماده 19) آنجاق ايللردير بو ماده فارس و شيعه اولمايان ميلت لر ايچين اؤزلليکله تورک قيزيلباشلار ايچين ساده جه کاغيذ اوزرينده قالميش دير و تورک – قيزيلباش لارين سورونلاري ايراندا کي ديگر رسمي و غيري رسمي توپلولوقلار كيمي، دونيانين حقوق اورقانلاريندا يانسيتيلماميش دير  و دونيانين چئشيتلي يئرلرينده و دييشيک اورقانلاريندا تمثيلجي لري اولماميش دير.  

  تاسفلرله تورک قيزيلباشلارين سياسي، سوسيال و کولتورل دوروملاري ديگر دينسل آزينليق لارا گؤره داها آغير و پيس وضيعت ده دير. بوگون باهايي توپلولوغونون18  اؤلكه ده شبهه سي بولونماقدادير. بو نده ن دن دولايي اولوشان هر هانسي بير سورونو BMT، اينسان حاقلاري کميسرلييي، "آوروپا اينسان حاقلاري" و ديگر اؤرگوت و تشکيلات لارا سرعتله يئتيشديره بيليرلر. حالبوکي تورک قيزيلباشلاري نين، دونيا گئنل ينده و ايران دا اؤز پروبلئم لريني يانسيتا بيله جك و قامويا چاتديرا بئله جک درنک و اؤرگودلري موجود دئييلدير. تورک قيزيلباش خاندان لارينا منسوب ده ده لرين مقاملاري بابادان اوغولا گئچدييي ايچين بو مقاملارين، اؤرگودلنمه يه قارشي اولمالاري، دولايلي ويا زورونلو اولاراق بازي قونولاردا رژيمله ايش بيرلييي ايچينده اولمالاري، ديکتاتؤر رژيمله قارشي قارشييا گلمه مه لري ايچين تقيه يه سيغينمالاري و اولوشان هر هانسي بير درنک ويا قورولوشا قارشي قويمالاريني ساغلايير. آيريجا تورک قيزيلباشلارين ميللي و ديني ايكي قات آيريمجيليغا معروض قالمالاري، ميللي کيمليک و ديني آچي دان شيعه لشمه و فارسلاشما آسيميلاسيون پوليتيکاسينا قوربان ائديلمه لري، تورک قيزيلباشلارين هم ايران ايسلام رژيمي طرفيندن هم ده BMT و آوروپا اينسان حاقلاري طرفيندن زرتشت لوق و ديگر آزينليق لار كيمي رسمي اولاراق تانينماماسي و تورک – قيزيلباش لارين درنک و اؤرگود قورمالارينا ايران ياسالاري نين اجازه وئرمه مه سي ائتکيلي ندن لردير. بو نا گوره 70 لي ايللره قدر تورک – قيزيلباش لار ين چوخونلوقلا قيرسال بؤلگه لرده اولماسيندان دولايي يازما اوخوما اوراني نين دوشوک اولماسي و ايندي کي ايران توپلوموندا رژيم طرفيندن دين ين سياسته آلت ائديلدييينده ن، توپلومدا اؤزلليکله گئنج نسيل ين دينه قارشي آنتي پاتي ده ن دولايي تورک – قيزيلباش درنک لرين قورولماسينا ايستي باخيلماماسي، ائتکيلي اولماقدادير.  

  بونلار قارداشليق و ائشيدليک ادعاسيندا اولان ايران ايسلام رژيمي نين تورک – قيزيلباش خالقينا ايلک و سون داربه سي اولماميش دير. هنوز تورك – قيزيلباش لارين دولت اورقانلارينا، يوکسک اوخوللارينا دوشونجه و ايدولوژيک سبب لردن دولايي آلينمامالاري[5] اونودولماميش دير. موللالارين مسجيدلرده تورک – قيزيلباش لارا قارشي پروپاقاندالاري، ايران اوردوسونون انتيظامي قووه لري نين سيخ سيخ جم ائولرينه باسقين ائله مه لري[6]، اوردو دا، اوخوللاردا و تورک – قيزيلباش لار ين ياشاديقلاري اؤز بوِلگه لرينده تورک – قيزيلباش لار ين آشاغي لانمالاري[7] و صيرف تورک – قيزيلباش اولدوقلاري ايچين دولت اورقانلاريندان ايشدن آتيلمالاري ويا اوست قدمه لره يوکسلمه مه  لري هانسي قارداشليق و ائشيدليک ايلکه لرينه دايانير؟ قوشاچاي ين اوچ تپه کندينه آغير سيلاحلارلا سالديريب، کندي يئرله بير ائتديکدن سونرا چاتيشمادا شهيد اولان تورک – قيزيلباش لارين جسدلريني توپلو مزارا قويلانماسي هانسي دوستلولوق و اينسانليک کيتابيندا وار؟ بوردا قوشاچاي اولاي لاري نين باش قهرمانلاريندان بيري اولان و 2009 ايلينده اورمو زيندانيندا صيرف قيزيلباش و قيزيلباش ليق حاقلاريني طلب ائتدييي اوچن اعدام ائديلن، مهدي قاسيمزاده’  نين آني لاريندان سطيرلر اوخومانيزي ريجا ائديرم: 

 " دؤرد ايل اؤنجه بيز ميانداپ (قوشاچاي) تورک – قيزيلباش لار ي، آشيري ظولمه معروض قالديغيميزدان دولايي اؤلكه نين دئييشيک اورقانلاري و ان سون اؤلكه نين ديني ليدرينه يازيلار يازديق و بو يازيلاردا علوي لييين (اهل حق ين) رسمي تانينماسيني و علوي لي يين راحاتسيز ائديلمه مه لري ايچين، آغير قوراللارين يوموشالماسيني طلب ائتديک. آنجاق اينتيظامي قوه لري، اؤلكه نين اوست مقاملاريندان امر آلاراق، بيزيم ياشام يئريميزه، اوچ تپه كنديميزه آغير سيلاحلارلا سالديرديلار و 6 کيشي بيزده ن اؤلدوردولر، بير چوخ علوي قارداشلاريميزي حتي ياشلي باباميزي توتوقلاييپ، آي لارجا فيزيکسل و روحسال شکنجه لر ائله ديلر و بوتون  مال وارليقلاريميزي تالاديلار و يئرله بير ائتديلر. آرخاداشلاريميز آيلار سونرا سربست قالديلار آنجاق بيز 5 کيشي حالا زندانداييق..." [8]

    ايران ايسلام رژيمي نين تورک – قيزيلباش لار  عليه ينه ائله ديكلري بونلارلا سينيرلي قالماميش دير. اؤلکه ده وار اولان بوتون اورقان و تشکيلاتلار ميللي و ديني آزينليق لار و چوغونلوکلارا سايغيلي اولماديقلاري كيمي يوکسک دين عاليملري و آيت الله لاردا تورک – قيزيلباش لارا و ديگر ديني آزينليق لارا سايغيلي داورانمايي بوراخين، حقارت ائديب، پيس نيت لي آچيکلامالاردا، خالقي تورک – قيزيلباش لارا قارشي قيشقيرتماقداديرلار. ايرانين ديني ليدري آيت الله خامنه اي تورک – قيزيلباش لار  حاقيندا دوشونجه لريني بئله ايفاده ائدير: 

   "حضرت علي نين تانري اولدوغونا اينانيرلارسا، کيتاب سيز اولان، مسلمان اولمايانلار كيمي ديرلر. ياني كافر و پيسديرلر.[9] "  آيت الله م.ت. بهجت  "اهل حق لر (تورک – قيزيلباش لار)  تميزديرلر يوخسا پيس؟"  سوروسونا ساده جه  و ساده جه  " پيس "  دييه جواب وئرميش.[10] او همده ائرمني، حيرستيان، کليمي، يهودي و زردوشتلري ايسلام ديني آچيسيندان مرتد و پيس دييه سؤيله ميش. عيني دوشونجه لري آيت الله گلپايگاني[11]، فاضل لنکراني[12] ده همن همن ايفاده ائتمک ده ديرلر."  

  علوي سورونلاريندان بحث ائدرسک، بو سورونلار بيتمئز. داها رژيمين رسمي قازئته لريندن، اورمو ايمام جوماسي حسني’ دن و... بحث ائتمه ديک. تورک – قيزيلباش لار ي ديشلاياراق، اونلاري شيعه لشديرمه يه چاليشاراق بير يئره واريلماز. ديل، دين، اينانج و عيبادت اؤزگورلويو تمل بير اينسانليق حقي دير. اينانج اؤزگورلويو اولمادان دموکراسي اولماز. يئتئر کي، علوي سورونونو چؤزمک اوچون ايراده اورتايا قوياق. بو سورونلاري چِوزمک ايچين؛ هر شئي دن اؤنجه علوي ليک بير اينانج و اينانج قوروپو اولاراق ايران ايسلام جمهوريتي طرفيندن رسما تانينمالي، تورکجه اولان عيبادت ديليميز، رسمي ديل اولاراق تانيتيلمالي و تورک ديلينده اوخوللارين آچيلماسي، جم ائولري نين عيبادت خانه اولاراق بيلينمه سي، زورونلو دين درس لري نين قالديريلماسي، قوشاچاي تراژدي سي نين آيدينلانماسي و سوچلولارين جزالانديريلماسي گرک مکده دير.  

  سؤزون بيتدييي يئرده ساده جه و ساده جه سايين احمد شهيد و اينسان حاقلارينا، اؤزنو آداميش بوتون اؤزگور روحلو اينسانلاردان و قورولوش لاردان بير ريجا ائتمك ايستيرم. لطفا ايران دا کي تورک علوي قيزيلباش لارينا  قارشي ائديلن حاقسيزليق لاري راپورلاريندا و  چاليشمالاريندا يئر وئرسين لر.

سون 

[1]  گاماج تمثيلجي سي ماشااله رزمي نين 15 مارت 2011 ده BMT اينسان حقلري كميسيونوندا آپارديغي دانيشيق دان آلينميش دير.

[2]  1350 نجب گونش ايللرينه قدر

[3]  گرچك اينانج ويا دوشونجه سيني سؤيله مه ييب، گيزلي توتما

[4]  Dannely, Jack, Teoride ve Uygulamada İnsan Hakları, Çev.: ERDOĞAN, Mustafa & KURKUT, Levent, Ankara, 1994

[5]  اولونان بوتون حاقسيزليقلاري اثبات ائله مك اوچون 1988 ده او دؤرين باشقاني م.ح.موسوي طرفيندن ايران اسلام جمهوريتينين ليدري خميني يه يازميش اولدوغو بخشنامه  گركلي اولاجاقديركي بو بخشنامه بوتون دوولت اورقانلارينا و والي ليكلرينه گوندريلير. بخشنامه ايندي يه قدر تورك قيزيلباشلارا ائديلن آيريمجيليق حاقسيزليقلارا قانونلارا گوره دوغرو اولماديغي ني و قيزيلباشلارين دانشگاه لارا آلينمامالاري شدتله قينانيلميشدير. بو بخشنامه قيزيلباشلار حاققيندا اولونان حاقسيزليقلاري اثباتلاماقدادير. باخين:

http://www.mardomsalari.com/Template1/News.aspx?NID=54015).

[6]  ايران رژيمينين انتظامي قوه لري طرفيندن زنجان استاني نين انگوران  بولگه سينده ياشاماقدا اولان تورك قيزيلباش لارينا (سير طاليبي) اولونان باسقي  و زاويه (جم ائوي) اوجاقلارينينن  تعطيل ائيلمه سي يوخسا بو اوجاقلارينين اوچورولاجاغي تهديدلري اشاغي دا كي لينك لرده باخا بيلرسيز: http://www.savalansesi.com/2008/11/blog-post_3707.html)

  و   (http://balatarin.com/permlink/2008/11/16/1450952

[7]  تبريز استاني مركزي جواريندا ايلخيچي شهرينده ايسه بو كيمي حيكايه لر آز – چوخ موجوددور. بسيجي لر قوه لري تورك قيزيلباشلارينين تانينميش آداملاريني زورلا آليب قرارگاه لارينا گوتورولدو و شكنجه ائديب، تحقير ائديرلردي. اونلاري تهديد ائديب، جم ائولرينه گئتمه مه لري اوچون تهديد ائديرديلر. http://qirxlar.blogspot.com/2006/07/blog-post_18.html)

[8]  دئتايلي بيلگي اوچون http://www.qurtulush.info/tur/Eleviler/aleviler1.pdf باخا بيليرسيز. آيريجا "تراژدي قيزيلباشان تورك قوشاچاي" كتابيني بو لينك دن اينديره بيلرسيز:  http://www.2shared.com/document/FbI_ue6e/5_qizilbas-_B5.html"

[9]  http://www.marjaeyat.com/fa/pages/?cid=473

[10]  http://bahjat.org/fa/index.php?option=com_content&task=view&id=1096&Itemid=61

[11]  گلپایگانی، محمدرضا، مجمع المسائل، قم، دارالقرآن، بی تا، ج1، ص44 ( اندیشه قم)

[12]  لنکرانی، فاضل، جامع المسائل، ج 1، ص 40، سؤال 88